Бұл туралы қала әкімі Нұрлыбек Нәлібаев халық алдында берген есебінде мәлімдеді, деп хабарлады ҚазАқпарат ХАА тілшісі.
Шаһар басшысының айтуынша, халықты көгілдір отынмен қамтамасыз ету бағытындағы жұмыстар кезең-кезеңімен жүзеге асырылуда.
Екі жыл бұрын Тасбөгет кенті мен Қызылжарма ауылдық округінде газдандыру жұмыстарына 2 млрд 157 млн. теңге бөлініп, 4 мыңнан астам тұрғын үй, әлеуметтік және кәсіпкерлік нысандар көгілдір отынмен қамтылды.
Ал былтырғы жылы Талсуат ауылдық округін газдандыру үшін облыстық бюджеттен 271 млн теңге қаралып, 500-ге жуық тұрғын үйге, 3 әлеуметтік нысанға табиғи газ тартылды.
Нәтижесінде қаланы газдандыру көрсеткіші 95 пайызды құрады.
Сондай-ақ Н.Нәлібаев мәлім еткендей, ҚР тұрғын үй-коммуналдық шаруашылығын жаңғырту мен дамытудың 2011-2020 жылдарға арналған бағдарламасы аясында соңғы төрт жылда қала бойынша 3 млрд 61 млн. теңгеге көпқабатты 121 тұрғын үй күрделі жөндеуден өтті.