Қызылорда қаласында «Мақсұтым - тіл ұстартып, өнер шашпақ» атты Абай оқулары байқауы болды
10:28, 25 Тамыз 2010
ҚЫЗЫЛОРДА. Тамыздың 25-і. ҚазАқпарат /Жаңагүл Сердалы/ - Қызылорда қаласында өзге ұлт өкілдерінің арасында «Мақсұтым - тіл ұстартып, өнер шашпақ» атты облыстық Абай оқулары байқауы болып өтті.
Байқауға қатысушылар берілген үш тапсырманы қазақ тілінде орындады. Олар ақын шығармалары мен «Абай жолы» романынан үзіндіні жатқа оқудан және Абай әндерін немесе қазақ халық әндерін орындаудан тұрды.
Байқау қорытындысында бірінші орынға сырдариялық Мария Потолова лайықты деп табылды. Екінші орынға шиелілік Татьяна Нуштаева көтерілсе, үшінші орынды қармақшылық Фаина Ашимова жеңіп алды. Ынталандыру сыйлығына қызылордалық Виктория Маханова мен жалағаштық Любовь Нам ие болды.
Байқау жеңімпазы М.Потолова қыркүйек айында Астана қаласында өтетін республикалық байқауға қатысады.