Қызылорда облысында балық өсіретін тоған шаруашылығы ашылды

ҚЫЗЫЛОРДА. Тамыздың 26-сы. ҚазАқпарат /Жаңагүл Сердалы/ - Қызылорда облысы Сырдария ауданының Айдарлы елді мекенінде балық өсіретін тоған шаруашылығы ашылды. Осы саланың маманы Жұматай Ізмағанбетов басшылық ететін бұл питомникте балықтың шабақ түрі өсіріліп, аудан көлеміндегі 7 көлге жіберіп тұратын болады.

Құрылым сондай-ақ уылдырық өсіруді қолға алғалы отыр. Мамандар уылдырық­тан пайда болған құртшабақтардың келесі бір шағын тоғандарда өсуіне жол ашылатынын айтады.

Айдарлы тоған шаруашылығы жұмысын бастаған бойда 2010-2015 жылдарға арналған балық өсіру жоспарын бекітті. Үстіміздегі жылы көлдерге барлығы 1520 дана шабақ жіберіледі. Ал таза суда өскен шабақтарды аулау жұмысы келер жылдан бастап қарқын алады.