ҚЫЗЫЛОРДА. ҚазАқпарат – Қызылорда облысында Конго-Қырым қанды безгегінен тағы бір адам көз жұмды, деп хабарлайды ҚазАқпарат тілшісі.
Шиелі ауданына қарасты Н.Бекежанов ауылының 32 жастағы тұрғыны Конго-Қырым қанды безгегінен көз жұмды. Бұл – аталған диагнозбен қаза болған үшінші адам.
«Жыл басынан облыс бойынша Конго-Қырым қанды безгегіне шалдығу күдігімен 29 жағдай тіркелді. Олардың арасынан 10-ы клиникалық-зертханалық және эпидемиологиялық жолмен нақтыланды. Атап айтқанда, Қармақшы, Сырдария аудандары мен облыс орталығында – 1, Жанақорғанда – 5, Шиеліде 2 дерек анықталды. Былтыр 601 адам дәрігерлер қарауында болса, биыл олардың саны 712 адамды құрайды», - деді облыстық Санитарлық-эпидемиологиялық бақылау департаменті басшысының орынбасары Әлия Әбдіқайымова.
Айта кетсек, бұдан бұрын Шиелі ауданының тұрғыны аталған диагноздан көз жұмған болатын.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.