Қызылорда облысында жыл басынан бері есірткімен байланысты 149 қылмыс анықталды

ҚЫЗЫЛОРДА. ҚазАқпарат - Қызылорда облысында жыл басынан бері 149 есірткі қылмысы анықталды, деп хабарлайды ҚазАқпарат тілшісі.

Облыс көлемінде өткізіліп жатқан «Қарасора-2022» жедел-профилактикалық іс-шарасы барысында 99 құқықбұзушылық анықталды. Оның ішінде 4-і есірткі затын аса ірі мөлшерде сақтау, 7-і есірткі сату, 53-і есірткі өсіру дерегі құрайды.

«Аталған шара барысында заңсыз айналымнан 31 келіге жуық марихуана және синтетикалық есірткі заты алынды. Нәтижесінде 20 698 түп сора өсімдігі жойылды», - деп атап өтті Қызылорда облысы Полиция департаментінің бастығы Мұхтар Қожабаев.

Іс-шара барысында жергілікті атқарушы және құқық қорғау органдарының қатысуымен жедел алдын алу іс-шарасын өткізу жоспары әзірленген. Бұл бағытта жұмыс топтары құрылып, кешенді жұмыстар атқарылуда.

Еске салсақ, Қызылордада түрмеге трамадол мен 5 телефон лақтырмақ болған адам ұсталды.