Қызылорда облысының Кардиоло­гия­ орталығында өткен жылы 140 адамның жүрегіне ашық ота жасалды

ҚЫЗЫЛОРДА. 21 қаңтар. ҚазАқпарат - Қызылорда облыстық денсаулық сақтау басқармасының ұйымдастыруы­мен жергілікті бұқаралық ақпарат құралдары өкілдеріне арналған ашық есік күні өтті.

Оның барысында журналистер бірқатар емдеу, диагностикалау мекемелерінде болып, олардың жұмысымен танысты.

Бұқаралық ақпарат құралдарының өкілдері алдымен, Облыс­тық медицина орталығы жанынан ашыл­ған Нейроинсульттік орталыққа тоқтады. Бұл орталық былтырғы жылғы ақпан айында ашылған болатын. Емдеу ор­та­лығы 100 төсек-орынға арналған, оның 40-ы жалғастыру реабили­та­циясына, 30-ы инсульт бөліміне және 30-ы жалпы неврологияға арналған. Ор­талық меңгерушісі Оңталап Өмірзақов­тың айтуынша, емдеу мекемесі ашыл­ғалы бері 42 науқасқа ота жасалған. Со­нымен қатар 36 млн. теңгеге құрал-жаб­дықтар сатып алынған.

Келесі кезекте журналистер Кардиоло­гия­ орталығына қарасты кардиохи­рургия бөлімшесінің жұмысын көрді. 2009 жылы ашылған орталықта үш жыл ішінде 1200 жүрекке ашық ота жа­салған, оның 140-ы - өткен жылы. Ересектермен қатар туабітті жүрек ақауы бар, салмағы сегіз келіден асатын балаларға да ота жасалуда. 2012 жылдың өзінде 48 бал­ғын отаға алынған. Мыңнан астам ко­ро­нарлық ота жасалған. Бөлімше зама­науи құрал-жабдықтармен қамтамасыз етілген. Бір ангиограф аппараты бар, алдағы уақытта екіншісі алынады деп күтілуде.

№6 қалалық емхана - облыс орталы­ғындағы ірі медициналық мекемелердің бірі. Емдеу- алдын алу орны 50 мың адамға арналған. Бір мезгілде 750 адамды қабылдайды. Сонымен қатар Ұлы Отан соғысы ардагерлері мен олар­ға теңестірілгендерге көмек көрсетеді. 2008-2010 жылдары «Жол картасы» бағ­дарламасы бойынша күрделі жөндеуден өткен. Емхананың бас дәрігері Әділбай Медетбековтің айтуынша, бүгінде меке­ме 63500 тұрғынға қызмет көрсетеді. Емдеу, диагностикалау мекемесі жаңа­лығының бірі - мұнда электронды терминал орнатылған. Ол келушілерге емхана қызметі жөнінде ақпарат береді. Рентген кабинеті, ардагерлер бөлмесі жаңа құрал-жабдықтармен жабдықтал­ған. 30 төсектік күндізгі бөлім де тұр­ғындар саулығын жақсартуға қызмет көрсетеді. Емханада бүгінгі таңда «Саламатты Қазақстан» бағдарламасы аясында скринингтік тексеру жүргізу шарасы жолға қойылған. Скри­нинг­тік тексеру ауруды ерте анықтауға мүмкіндік береді. Бүгінде ол тоғыз ауру түрі бойынша жүргізілуде.

Бұқаралық ақпарат құралдарының өкілдері аялдаған соңғы нысан Облыстық туберкулезге қарсы күрес диспансері болды. 1981 жылы пайдала­нуға берілген диспансер 370 төсек-орынға арналған. Қазіргі таңда мұнда 290 науқас емделуде.

Жалпы, облыс бойынша туберкулез­ге қарсы іс-шаралар 2011-2015 жылдар­ға арналған «Саламатты Қазақстан» мемлекеттік бағдарламасы және Ден­сау­лық сақтау министрлігінің «Тубер­ку­лез­бен күрес жөніндегі кейбір мәсе­лелер туралы» бұйрығы аясында жүргі­зіледі. Аймақта туберкулезді анықтауға, емдеуге және сауықтыруға барлық мүм­кіндік жасалған. Бұл орайда 9 диспан­сер, 870 орындық аурухана, 200 төсектік ересектерге, 100 төсектік бала мен жас­өспірімдерге арналған шипажай, 1600 орындық 14 санаторлық балабақша жә­не 410 орындық екі санаторлық мектеп жұмыс жасауда. Диспансердің матери­ал­дық-техникалық базасы да жылдан-жылға нығайып келеді. Сондай-ақ, диспансердің бас дәрігері Әбдіғабит Әбләзім ауруларды емдеуге негізгі дәрілермен қатар, екінші қатардағы дәрілер қорының да жеткі­лікті жасақталғанын айтты. Сондай-ақ, науқастарды емге ынталандыру жә­не ем сапасын арттыру мақсатында жа­һан­дық қор есебінен 443 ауруға азық-түлік себеті мен гигиеналық заттар, емханаға қатынау үшін 75 сырқатқа айына 4 000 теңгеден қаржы қаралған.

Осындай жұмыстар нәтижесінде өткен жылы облыста әр 100 мың адамға шаққанда туберкулезге шалдығу 2011 жылғы 98,8-ден 92,1-ге төмендеді. Яғни, 2011 жылы алғаш рет туберкулезге шалдыққан 692 ауру тіркелсе, өткен жылы оның саны 662-ні құраған. Десек те, шешімін күтіп тұрған мәселелер де жоқ емес. Мәселен, туберкулезге қарсы күрес мекемелерінде сорып-шығару желдеткіш жүйесінің орнатылмағаны белгілі болса, мультирезистентті ауру­лар­ды емдейтін қалалық тубдиспансер­дің ғимараты күрделі жөндеуді қажет етеді, сонымен бірге облыстағы бар төсек орын есебінен қалалық тубдиспансердің төсек-орнын 20-ға арттыру қажеттілігі туындауда.

Шара соңында облыстық денсаулық сақтау басқармасының бастығы Серік Игембаев бұқаралық ақпарат құралда­ры өкілдеріне арнап баспасөз мәслиха­тын өткізді. Онда басқарма басшысы өткен жылы салада атқарылған жұмыс­тар жөнінде әңгімелеп, алдағы жұмыс жоспары туралы айтып өтті.