ҚЫЗЫЛОРДА. ҚазАқпарат - Қызылордада 33 қасқалдақ атып алған аңшылар ұсталды, деп хабарлайды ҚазАқпарат тілшісі.
Арал ауданы полиция бөлімінің қызметкерлері 1 қарашада рейд жүргізген болатын. Аталған шара барысында Кіші Арал теңізінің аймағында аңшылықпен заңсыз айналысқан 3 азамат қолға түсті.
Олар мінген «Нива» автокөлігін тексеру барысында 56 келі сазан балығы, 37 құс (33 қасқалдақ, қаз, үйрек) тәркіленді. Сондай-ақ, олардан 3 аңшы мылтығы және 140 дана оқ алынды.
«Қолға түскен азаматтардың үшеуі де жұмыссыз. Барлығы Арал ауданында тұрады. Тексеру барысында олардың қолындағы аңшы мылтығы ішкі істер органдарында тіркеуде жоқ екендігі анықталды. Сараптамалар тағайындалды. Аталған дерек бойынша ҚР Қылмыстық кодексінің 337-бабы 1-бөлігімен (Заңсыз аңшылық) тергеп-тексеру амалдары жүргізілуде», - деп мәлім етті Қызылорда облыстық Полиция департаментінен.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.