ҚЫЗЫЛОРДА. ҚазАқпарат - Қызылорда облысында абайсызда электр тогына түсіп қалған 17 жастағы жасөспірім оқиға орнында көз жұмды, деп хабарлайды ҚазАқпарат тілшісі.
Оқиға бүгін, 20 қарашада түнгі 01.50 кезінде Шиелі ауданына қарасты Нартай Бекежанов ауылында болған.
Сол уақытта облыстық төтенше жағдайлар департаменті дағдарыс жағдайында басқару басқармасына хабар келіп түсті.
Хабарламада 2003 жылы дүниеге келген жасөспірімнің абайсызда электр тогына түсіп, қайтыс болғаны айтылған.
Оқиға орнына төтенше жағдайлар, полиция және медициналық жедел жәрдем бригадасынан мамандар барды. Оқиғаның мән-жайын анықтады.
«Осыған байланысты азаматтардан қауіпсіздік ережелерін қатаң сақтауды, балалар мен жасөспірімдерді қараусыз қалдырмауды, тұрмыста қырағы және сақ болуды сұраймыз», - деді облыстық төтенше жағдайлар департаментінен.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.