ҚЫЗЫЛОРДА. ҚазАқпарат - Қызылордада белгілі кәсіпкер Тынымбай Баженовтің із-түссіз кетуіне байланысты қылмыстық іс қозғалды. Ол 15 ақпаннан бері табылмай жатыр, деп хабарлайды ҚазАқпарат тілшісі облыстық прокуратураға сілтеме жасап.
«Кәсіпкерді іздеу жұмыстары жалғасуда. 24 ақпан күні облыстық прокуратура және полиция департаменті басшыларымен осы мәселеге байланысты арнайы жиналыс өткізілді. Т. Баженовтың із-түссіз кетуіне байланысты ҚР Қылмыстық кодексінің 99-бабына (кісі өлтіру) сәйкес іс қозғалды. Қалған мәліметтер тергеу құпиялығына байланысты жария етілмейді», - делінген хабарламада.
Қылмыстық іс облыстық прокуратура, облыстық ішкі істер басқармасы басшыларының қатаң бақылауында.
Баженовтың белгісіз бағытқа жоғалып кетуіне байланысты 24 ақпанда кісі өлімі жөніндегі сотқа дейінгі тергеп тексеру ісі облыстық прокуратураның нұсқауына сәйкес ҚР ҚК 99 бабымен (кісі өлтіру) сараланды. Қазіргі таңда тиісті тергеу амалдары жүргізілуде.
Естеріңізге салсақ, бұған дейін облыстағы белгілі кәсіпкер Тынымбай Баженов жоғалып кеткені туралы хабарлаған болатынбыз.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.