ҚЫЗЫЛОРДА. ҚазАқпарат - Қызылорда облысы Жаңақорған ауданына қарасты Қожакент ауылында тұратын бір отбасының алты мүшесі көмірқышқыл газына уланып қалды, деп хабарлайды ҚазАқпарат тілшісі.
Оқыс оқиға салдарынан олар аудандық ауруханаға түсті. Қажетті ем алғаннан кейін олардың денсаулығы қалпына келді.
Оқиға барысы былайша өрбіген. Тұрғын үй пешінің мұржасы тартпай қалған. Соның салдарынан түтін үйдің ішіне жайылған. Үй иесі терезелерді ашып желдетіп, бөлме ішін түтіннен тазартады. Дегенмен көмірқышқыл газының иісі қалып қояды. Оны таң атқаннан кейін тазартуға шешім қабылдайды. Ол отбасы мүшелерінің көмірқышқыл газынан уланып қалуына себеп болған.
«Мұндай жағдай жиі кездесіп жатады. Сондықтан тұрғындарға өмірлеріне немқұрайлықпен қарамауын сұраймыз», - деді Қызылорда облысының төтенше жағдайлар департаменті мемлекеттік тіл және ақпарат тобының бас маманы Айгүл Нұрманова.
Естеріңізге сала кетелік, бұдан бұрын Қызылордада иіс тиіп уланған үш бала көз жұмғанын хабарлаған едік.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.