ҚЫЗЫЛОРДА. ҚазАқпарат - Қызылорда облысында бірнеше мәрте ірі мөлшерде пәтер ұрлығын жасаған тұрғын бас бостандығынан айырылды, деп хабарлайды ҚазАқпарат тілшісі.
Оқиға Қазалы ауданында тіркелген. Жергілікті тұрғын биылғы жылдың маусым айының 11-30 күндері бірнеше үйден дүние-мүлік ұрлап кеткен.
Осылайша оларға ірі мөлшерде шығын келтірген.
Аталған дерек бойынша ҚР Қылмыстық Кодексінің 188-бабы 3-бөлігінің 1,2,3-тармақтарымен сотқа дейінгі тергеп-тексеру жүргізілді.
Онда тұрғын үй-жайға бірнеше рет кіру арқылы бөтеннің мүлкін ірі мөлшерде жасырын жымқыру жағдайы көрсетілген.
«Сотқа дейінгі тергеп-тексеру барысында дәлелдемелер жинақталып, сот сараптамасы жүргізілді. Осыған сәйкес Қазалы аудандық сотының үкімі негізінде 25 жастағы айыпталушыға 4 жыл 6 ай мерзімге бас бостандығынан айыру жазасы тағайындалды» деп мәлім етті Қызылорда облыстық полиция департаментінің баспасөз қызметінен.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.