ҚЫЗЫЛОРДА. ҚазАқпарат - Қызылорда облысында жыл басынан бері есірткінің заңсыз айналымына байланысты сотқа дейінгі тергеп тексеру бойынша бірқатар құқық бұзушылықтар тіркелді, деп хабарлайды ҚазАқпарат тілшісі.
«Оның 8-і есірткі затын сату, 1-і есірткіні жарнамалау дерегі болып отыр. Сонымен қатар ҚР Қылмыстық кодексінің 296-бабында көзделген қылмыстық теріс қылықтың 20 дерегі анықталған. Онда есірткі, психотроптық заттармен, сол тектестермен, прекурсорлармен өткізу мақсатынсыз заңсыз жұмыс істеу жағдайы көрсетілген», - деп мәлім етті Қызылорда облыстық полиция департаментінен.
Есірткіге тосқауыл қою үшін біршама іс-шаралар атқарылуда. Есірткінің заңды айналымы саласындағы құқық бұзушылықтарды анықтау мақсатында биыл «Дәрмек» жедел профилактикалық іс-шарасы өткізілді.
Шара барысында Қызылорда облысы аумағында 16 дәріхана, 1 қойма және 5 денсаулық сақтау саласындағы мекемелері тексеріліп, есірткі өткізудің 3 дерегі және ҚР Әкімшілік құқық бұзушылық туралы Кодекстің 427-бабында көзделген әкімшілік құқық бұзушылықтың 8 дерегі анықталды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.