ҚЫЗЫЛОРДА. ҚазАқпарат - Қызылорда облысында ескексіз қайықпен көлдің ортасында қалып қойған екі адам құтқарылды, деп хабарлайды ҚазАқпарат тілшісі.
Оқиға 24 тамызда жергілікті уақытпен сағат 17.50-де Арал ауданына қарасты Қамыстыбас елді мекені аумағындағы Қамбаш көлінде болған. Жергілікті тұрғындар балық аулау кезінде қайықтың ескегін суға түсіріп алған.
«Оларды құтқарушылар кезекшілік атқару барысында байқаған. Ескексіз қалған азаматтар қайықпен жағалауға жете алмай қалды. Жедел құтқару жасағының мамандары күшімен 1974 және 1980 жылғы екі азамат жағаға шығарылды. Оларға психологиялық көмек көрсетілді», - деді Қызылорда облыстық Төтенше жағдайлар департаменті Өрт сөндіру және авариялық-құтқару жұмыстары қызметінің баспасөз хатшысы Әлия Ережепова.
Еске салсақ, түнде Сырдарияда жүзбек болған жігітті төтеншеліктер құтқарды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.