ҚЫЗЫЛОРДА. ҚазАқпарат - Қызылорда облысында балалар арасында коронавирус инфекциясы өршіп барады, деп хабарлайды ҚазАқпарат тілшісі.
Қазір облыстық балалар ауруханасында 46 бала ем алуда. Олардың арасында бір жасқа толмаған 13 сәби бар. Ал 3 жасөспірім жансақтау бөлімінде жатыр.
«Коронавирусқа шалдыққан балалар саны күн санап көбейіп келеді. Облыстық балалар ауруханасына сәуір айынан бастап 158 бала келіп түсті. Бүгінгі күні толық жазылып шыққан балалар саны - 82. Осы орайда ата-аналарға айтарым, балаларыңызды барынша санитарлық талаптарды сақтауға шақырыңыздар. Індет жас талғамайды. Сондықтан балалармен көпшілікке жерге баруды азайтып, иммундық жүйені жақсартатын пайдалы тағамдарды көп тұтынған абзал», - деді көп бейінді облыстық балалар ауруханасының онкогематолог дәрігері Жанна Жандарбекова.
Еске салсақ, Қызылордада карантин талаптарына байланысты жаңа қаулы бекітілді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.