ҚЫЗЫЛОРДА. ҚазАқпарат - Қызылорда облысы Сырдария ауданында бүгін таңертең анықталған 3 науқастың екеуі қойылған диагнозға сенбей, аудандық жұқпалы аурулар ауруханасында ем алудан бас тартқан, деп хабарлайды ҚазАқпарат тілшісі.
Бұл жөнінде облыстық денсаулық сақтау басқармасының басшысы Жақсылық Абдусаметов Өңірлік коммуникациялар қызметінде өткен брифингте айтып берді.
«Сырдария ауданындағы 2 науқас өздеріне қойылған диагнозға қарсылық танытқан оқиға кездесті. Мұндай жағдай жұмысымызға кедергі келтіреді. Біз тұрғындарды түсіністік танытуға шақырамыз», – деді басқарма басшысы.
Сондай-ақ, басқарма басшысы Арал ауданында тіркелген 1 науқас «Астана – Қызылорда» бағытындағы пойызда жолсерік болғандығын айтып өтті. Ол Түркістан облысындағы қауіпті індетті жұқтырған науқасты тасымалдаған.
Соңғы деректер бойынша Қызылорда облысында 69 адам коронавирус инфекциясын жұқтырған.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.