ҚЫЗЫЛОРДА. ҚазАқпарат - Қызылорда облысында полицейлер ауа райы қолайсыздығынан жол бойында қиын жағдайға тап болған 15 автокөлік иесіне көмек көрсетті, деп хабарлайды ҚазАқпарат тілшісі.
17 қарашада Қызылорда облысында ауа райы күрт суытты. Қар жауып, жолда мұз қатты. Осының салдарынан тәулік ішінде жолдың тайғақ болуына байланысты 17 жол-көлік оқиғасы тіркелді. Оқиғалар барысында 1 адам дене жарақатын алды. Көліктерге елеулі көлемде материалдық шығын келді.
Республикалық маңызы бар жолдарда көлік жүргізушісі жолдың мұз, тайғақтығынан басқару жүйесіне ие бола алмай қалған оқиғалар кездесті. Осындай жағдайға байланысты патрульдік полиция рота қызметкерлері жолдан шыққан 15 автокөлікке көмек көрсетті. Бұл автокөліктер қайта жолға шығарылды.
«Патрульдік полицейлер осындай жағдайда қандай әрекет жасау керек екендігін біледі. Мұндай сәттерде эвакуаторды шақыру, қажет болған жағдайда елді мекенге жеткізу, көлік құралының қозғалтқышын жылыту, эвакуациялау жұмыстарын жүргізеді. Біз қызметкерлерімізді кез - келген жағдайларға дайын болуға үйретеміз», - деді Қызылорда облысы Полиция департаментінің бастығы полиция полковнигі Бектөре Сұлтан.
Еске салсақ, 17 қарашада Қызылордада биылғы алғашқы қар жауды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.