ҚЫЗЫЛОРДА. ҚазАқпарат - Қызылордада тергеу изоляторында отырған інісіне аяқ қиім табанына жасырып телефон өткізбек болған азаматша ұсталды, деп хабарлайды ҚазАқпарат тілшісі.
Бұл оқиға Қызылорда қаласындағы ЗК-169/1 мекемесінде болды. Режим және күзет бөлімінің қызметкерлері аталған әкімшілік құқық бұзушылықтың жолын кесті. Телефон сотталғандарға тыйым салынған заттар қатарында саналады. «Тергеу изоляторында отырған азамат қарақшылық және кісі өлтіру бабы бойынша қамауға алынған. Оған апасы осындай жолмен телефон өткізбек болған. Мекеме қызметкерлері тексеру кезінде аяқ киімнің табанына мұқият жасырылған ұялы телефон, сим-карта мен қуаттағыш құрылғысын тәркіледі», - деп мәлім етті Қызылорда облысы бойынша Қызылорда облысы қылмыстық-атқару жүйесі департаментінің баспасөз қызметі.
Құқы бұзушыға қатысты ҚР Әкімшілік құқық бұзушылық туралы кодексінің 481-бабы бойынша хаттама толтырылды. Іс-құжаттары Қызылорда қаласының мамандандырылған әкімшілік сотына жолданды.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.