Қызылорда облыстық Қылмыстық атқару жүйесі департаментіне қарасты ЗК-169/5 мекемесінің өндірістік аймағына сотталғандардың пайдалануы мен қолдануына тыйым салынған заттарды лақтырмақ болған екі азамат ұсталды. Жедел түрде мекемеге Қызылорда қалалық Полиция басқармасының жедел-тергеу тобы шақыртылды.
«Тексеру барысында азаматтардан 20 грамдық шприцке нығыздалып салынған 10 дана өзіне тән ерекше исі бар шөп тектес зат және скотчпен оралған 3 телефон тәркіленді. Тәркіленген зат бойынша сот-медициналық сараптама тағайындалды. Нәтижесінде оның салмағы 62,02 грамм марихуана екені дәлелденді. Аталған дерек бойынша ҚР Қылмыстық кодексінің 297-бабының 1-бөлігімен сотқа дейінгі тергеп-тексеру жұмыстары жүргізілуде», - деп мәлім етті Қызылорда облыстық Қылмыстық атқару жүйесі департаментінен.
Еске салсақ, бұдан бұрын Қызылордада шеңгел мен сексеуілдің арасына есірткі өсірген ауыл тұрғыны ұсталды.