ҚЫЗЫЛОРДА. ҚазАқпарат -Қызылорда қаласында 15 жастағы жасөспірім жүргізген көлік апатқа ұшырады, деп хабарлайды ҚазАқпарат тілшісі.
Оқиға Абай даңғылы мен Қ.Ажаров көшесінің қиылысында болған. 2004 жылы дүниеге келген жасөспірім «Nissan Europe» көлігімен Тасбөгет бағытына келе жатқан. Сол сәтте алдында кетіп бара жатқан «Renault Duster» автокөлігінің артқы жағынан соққан.
«Нәтижесінде жүргізуші мен оның баласы жеңіл жарақат алған. Басқа зардап шеккендер жоқ. Тиісті сот-медициналық сараптама тағайындалды, қорытындысы бойынша шешім қабылданады», - деді Қызылорда облыстық полиция департаменті.
Естеріңізге сала кетелік, бұдан бұрын Қызылордада жол-көлік оқиғасынан мотоцикл жүргізушісі көз жұмғанын хабарлаған едік.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.