ҚЫЗЫЛОРДА. ҚазАқпарат - Қызылордада жезөкшелікпен айналысқан үш ер адам есепке алынды, деп хабарлайды ҚазАқпарат тілшісі.
Қызылорда облысының Полиция департаменті 7-9 қыркүйек аралығында «Stop-трафик» жедел-профилактикалық іс-шарасын өткізді. Шара барысында адам саудасына байланысты 4 қылмыс тіркелгені анықталды. Оның ішінде 1-і жезөкшелікке, 3-і жеңгетайлыққа қатысты болып отыр.
«Аталған шара барысында 1 адам жеңгетайлықпен айналысқаны үшін жауапқа тартылды. Ал 10 адам жезөкшелікпен айналысқаны үшін есепке алынса, олардың 3-і ер адам екені белгілі болды. Сондай-ақ, ҚР Әкімшілік құқық бұзушылық туралы кодексінің 450-бабымен жезөкшелікпен айналысуға үй-жайды ұсынғаны үшін 4 азамат анықталып, әкімшілік жауапқа тартылды», - деп мәлім етті Қызылорда облыстық полиция департаментінен.
Еске салсақ, бұдан бұрын Байқоңырда әлеуметтік желі арқылы тұрғындарды қорқытқан адам қолға түсті.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.