Қызылордалықтар Дельфийлік ойындарда 7 медаль еншіледі
Қызылорда қаласынан жолдама алған 27 шығармашыл жас қоржынға 7 медаль салып, жалпы командалық қорытынды бойынша үздік бестікке кірді, деп хабарлады ҚазАқпарат тілшісі.
«Самұрық» инновациялық идеяларды дамыту орталығы» қоғамдық қорының директоры Жандос Түсмағанбетов айтуынша, байқауға қатысқан жастар халықтық би, ым-ишарат тілінде ән орындау, эстрадалық ән салу, академиялық ән орындау, дәстүрлі ән орындау, прима қобыз, домбыра, баян номинациялары бойынша өнер көрсеткен.
«Баян» аталымы бойынша Жансая Пірназарова алтын еншіледі. Онан соң «Ым-ишарат тілінде ән салу» номинациясында Сағи Мұхамбет, «Эстрадалық ән салуда» ең жас қатысушы Қарақат Базарбай жеңіп шықты. Ал «Прима қобызда» Нұрсамал Қазақбай күміс жүлдеге ие болды. Мұхамеддин Көшербай мен Жансұлтан Жұмабек «Домбыра» аталымында қоланы қанағат тұтты. Сонымен қатар, Дәулетхан Ізбасқан «Дәстүрлі ән салу», ал «Сыр гүлі» би тобы «Халықтық биде» дипломант атанды.
Енді аталмыш сайыстың жеңімпаздары жылдың аяғында Санкт-Петерборда өтетін Әлемдік Дельфийлік ойындарда бағын сынайтын болады.