Леңгірде жаңа Аллеяның құрылысы басталды - Түркістан облысы

АСТАНА. ҚазАқпарат - Тамыз айының басында Түркістан облысы Төле би ауданының әкімі Бауыржан Омарбековтің төрағалығымен «Леңгір қаласы аумағын аббаттандыру туралы» жиналыс өтіп, аудан әкімі қала әкіміне қаланың безендірілуін басты назарда ұстауды тапсырған болатын. Нәтижесінде араға екі апта салысымен аудан әкімінің тапсырмасына сәйкес, жұмыстар басталып та кетті, деп хабарлайды otyrar.kz.

Аллея сағат стелласымен бірге Қапал батыр көшесінде орналасатын болады.

Қазіргі таңда мұнда монтаждық жұмыстар, алаңдардың жоспары жүргізілуде. «Аймақты абаттандыру және қалада тұрғындар үшін ыңғайлы орта қалыптастыру - Ленгер қаласы әкімдігінің ең басты міндеттерінің бірі болып табылады», - деп абаттандырудың маңызын түсіндіреді қала әкімі Болат Әділбеков. Әкімнің сөзінше, Аллея құрылысы, қалаға кіреберіс арканы қайта құру қазанның алғашқы күндерінде ұйымдастырылатын қала күніне дейін аяқталады.

Еске сала кетейік, 2018 жылы Леңгірде 17 қоғамдық орынды абаттандыру жүргізіледі, оның ішінде 13 балалар және 4 спорттық алаңшалар бар. Оның ішінде 5 балалар мен 1 спорттық алаңша пайдалануға беріліп қойылған. 2018 жылы аймақты абаттандыруға қала бюджетінен қаражат қарастырылған. Оның ішінде Қапал батыр көшесіндегі қалаға кіреберіс арка, лэд-экран және сквер, Төлеби көшесіндегі «Мемлекеттік рәміздер» алаңшасы бар. Сондай-ақ, қалалық аурухана алдынан «Шаңырақ» скверін салу жоспарлануда.