Лифтіде баланы пышақтаған жасөспірімді жалғызбасты ана тәрбиелеп отыр

АСТАНА. KAZINFORM — Елордада 5 жасар баланы лифті ішінде пышақтаған жасөспірімді жалғызбасты ана тәрбиелеген. Бұл туралы Мәжіліс депутаты Таңсәуле Серіков мәлім етті.

— Елімізде 200 мыңнан астам психикалық ауытқуы бар адам бар, оның 28 мыңы бала. Лифтіде болған жағдай бойынша айтайын, ол жалғызбасты ана, қамқоршы ретінде алатын ақысы 60 мың теңге, баласының екінші топтағы мүгедектігі ретінде алатын жәрдемақысы 80 мың теңге. Ол жұмыс істеуге баласының сыртынан жауып кетті, ал баланың ойында не болды, ол жасөспірім әбден дайындалды, пышақтың сабын пакетпен орады, жақсылап киінді, баланың бетінен ұрды. Оған не деп айтасың?, — деді Таңсәуле Серіков Мәжіліс қабырғасында.

Халық қалаулысының мәліметінше, биыл 12 мың мүгедек жан анықталды, оның ішінде 10 мың бала бар, соның ішінде 6 мың бала аутизмге шалдыққан. 

Бүгін Мәжілістің Әлеуметтік-мәдени даму комитетінде психология қызметінің проблемалары мен шешу жолдары қаралды. 

Айта кетейік, елімізде психологиялық қызмет туралы арнайы заң жобасы қолға алынды.  

Еске сала кетсек, елордада жасөспірім лифті ішінде баланы пышақтап тастаған еді. Кейін белгілі болғандай пышақпен шабуылдаған жасөспірім арнайы есепте тұрған.

Дәрігерлер зардап шеккен балаға дереу ота жасап, психологиялық көмек көрсетті.

Қазір баланы пышақтаған жасөспірім психиатриялық стационарда.