АСТАНА. KAZINFORM — 9-16 маусым аралығында көгалдағы төсеніште өтетін Лондон (Ұлыбритания) WTA 500 турнирінің жеребесі тартылды.
Жүлде қоры 1 млн 415 мың еуроға бағаланған жарыста барлығы 32 теннисші бақ сынайды.
Дүниежүзілік рейтингіде 11-орында тұрған Елена Рыбакина корольдік жарыстың 4-ракеткасы болып тіркелген. Рейтингісі жоғары болғандықтан, ол доданы екінші айналымнан бастап, онда әлемнің 31-ракеткасы, отандасы Юлия Путинцева немесе іріктеу сайысы жеңімпаздарының бірімен кездеседі.
Сонымен қатар Е.Рыбакина мен Ю.Путинцева жұптық сында кортқа шығып көрмек. Олардың алғашқы қарсыластары – испаниялық Кристина Буча – бразилиялық Беатрис Хаддад Майя.
Қазақстанның жұптық сындағы бірінші ракеткасы Анна Данилина Лондон кортында ресейлік Диана Шнайдермен бірге бастапқы айналымда ресейлік Александра Панова – мексикалық Джулиана Олмоспен шеберлік байқасады.
Еске сала кетейік, бұдан бұрын Анна Данилинаның Ролан Гаррос турнирінің финалында есе жібергенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).