«Отырыс қорытындысы бойынша Мәдениет және спорт министрлігіне бағынысты жоғары және жоғары оқу орнынан кейінгі білім беру ұйымдары арасында бакалавр даярлауға 1690 орын бөлінді. Оның ішінде Қазақ ұлттық өнер университетіне -315 орын, Темірбек Жүргенов атындағы Қазақ ұлттық өнер академиясына-300, Құрманғазы атындағы Қазақ ұлттық консерваториясына-200, Қазақ ұлттық хореография академиясына-25, Түркістандағы Халықаралық Туризм және меймандостық университетіне-800 орын берілді», - деп жазды әлеуметтік желідегі парақшасына Мәдениет және спорт министрі Асхат Оралов.
Магистранттарды даярлауға 2023-2024 оқу жылына 166 орын бөлінген. Оның 54-ін Қазақ ұлттық өнер университеті, 63-ін Темірбек Жүргенов атындағы Қазақ ұлттық өнер академиясы, 39-ын Құрманғазы атындағы Қазақ ұлттық консерваториясы, 10 грантты Қазақ ұлттық хореография академиясы алған.
«Докторантураға түсу үшін 26 орын былайша бөлінді: 9-ы Қазақ ұлттық өнер университетіне, 10-ы Темірбек Жүргенов атындағы Қазақ ұлттық өнер академиясына, 5-еуі Құрманғазы атындағы Қазақ ұлттық консерваториясына берілсе, 2-ін Қазақ ұлттық хореография академиясы алды.
Техникалық және кәсіптік, орта білімнен кейінгі білімі бар кадрларды даярлауға 2023-2024 оқу жылына 700 орын бөлінді. Қазақ ұлттық өнер университетінің колледжі - 100, Темірбек Жүргенов атындағы Қазақ ұлттық өнер академиясының колледжі – 60, Қазақ ұлттық хореография академиясының колледжі – 40, Жүсіпбек Елебеков атындағы республикалық эстрада-цирк колледжі – 65 орын, 70 орын Александр Селезнев атындағы Алматы хореографиялық училищесіне, 60 орынды Орал Таңсықбаев атындағы Алматы сәндік – қолданбалы өнер колледжі алды, П.Чайковский атындағы Алматы музыкалық колледжіне 105 орын бөлінді», - делінген министрдің жазбасында.
Спорт саласында техникалық және кәсіптік, орта білімнен кейінгі білімі бар кадрларды даярлауға орындар былайша бөлінді: Кәркен Ахметов атындағы олимпиада резервінің республикалық мамандандырылған мектеп-интернат- колледжіне 40 орын, Республикалық спорт колледжіне – 80 орын, Алматы қаласының «Шаңырақ» шағын ауданындағы олимпиада резервінің республикалық мамандандырылған мектеп-интернат-колледжіне – 20 орын бөлінді, Қажымұқан Мұңайтпасов атындағы олимпиада резервінің республикалық мамандандырылған мектеп-интернат-колледжіне – 40. Риддер қаласындағы олимпиада резервінің республикалық мамандандырылған мектеп-интернат-колледжіне - 20 орын.