НҰР-СҰЛТАН. ҚазАқпарат – Қазақстанның бірінші, әлемнің 44-ракеткасы Александр Бублик жұптық сында да Мадрид мастерс турнирін сәтті бастады, деп хабарлайды ҚазАқпарат тілшісі.
Қазақстандық теннисші чилилік Кристиан Гаринмен бірге бастапқы кездесуін осы доданың 5-ракеткалары, америкалық Раджив Рам – ұлыбританиялық Джо Сэлисберимен өткізді.
Қазақстандық-чилилік жұп сағат жарымға созылған матчта 7:6 (7:5), 7:5 есебімен жеңіске жетті.
А.Бублик пен К.Гарин ширек финалға шығу үшін бельгиялықтар Сандер Жилле – Йоран Флигенмен таласады.
Александр Бублик әзірше жекелей сында да табысты өнер көрсетуде. Сәрсенбі күні оның үшінші айналымдағы қарсыласы анықталды. Дүниежүзілік рейтингте 27-орында тұрған ресейлік Аслан Карацев әлемнің 9-ракеткасы, аргентиналық Диего Шварцманды 2:6, 6:4, 6:1 есебімен тізе бүктірді. Енді А.Бублик пен А.Карацев жекелей сында ширек финал жолдамасын сарапқа салады.
Еске сала кетейік, бұдан бұрын Александр Бубликтің Мадрид мастерс турнирінің үшінші айналымына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).