МАЭК-тегі апаттың себебін анықтау үшін комиссия жұмысын бастады
Жұмыс тобы орталық диспетчерлік пунктіне барып, электр генерациялайтын орталықтың жұмысымен танысты. Осыдан кейін комиссия мүшелері бір күн бұрын апат болған электр станциясына барды.
№1 энергия блогы тоқтаған сәттен бастап қазандық салқындату процесінде тұр. №1 энергоблокты жөндеу жұмыстары 5 шілдеге жоспарланған. Жөндеу жұмыстары аяқталғаннан кейін толық көлемде іске қосылады.
«Маңғыстау атом энергетикалық комбинатының аумағында үш энергия құраушы станция (ЖЭС, ЖЭО-1, ЖЭО-2) бар, олардың әрқайсысы энергия блоктарынан тұрады. ЖЭС энергия блоктарының бірінде жөндеу жұмыстары жүргізіліп жатыр, қалған екеуі жұмыс істейді. Кеше, 3 шілдеде жылу электр станциясында жүктемесі 130 МВт болатын №1 энергоблок апатты жағдайда ажыратылды. Осыған орай, бүгінгі күні станцияда тек бір энергия блогы жұмыс істейді. Менің тапсырмам бойынша өңірде апаттың себебін анықтау үшін арнайы комиссия құрылды. Апатты жою үшін шұғыл шаралар қабылдау қажет. Бұл жерде энергияны тұрғындарға беру бойынша еш шектеулер жоқ. Бірақ апаттың салдары ірі кәсіпорындарға әсер етті. Мамандардың айтуынша, тоқ көзінен ажыратылған №1 энергия блогы жөнделгеннен кейін толық көлемде іске қосылады», - деді Маңғыстау облысының әкімі Нұрлан Ноғаев.
Облыс әкімі ҚР Президенті Қасым-Жомарт Тоқаевтың тапсырмасы бойынша Атырау МӨЗ және Маңғыстау атом энергетикалық комбинатында болған оқиғаның себептерін тергеу бойынша Мемлекеттік комиссия құрылғанын айтты.
«Мемлекеттік комиссияны Премьер-Министр Әлихан Смайылов басқарады. Жағдай Үкіметтің бақылауында. Болашақта басқа апаттардың алдын алу үшін болған оқиғаның мән-жайын анықтау қажет. Мемлекет басшысының қолдауымен МАЭК-ті жаңғырту бойынша көптеген жұмыс жүргізіліп жатыр. Жалпы сомасы 28 млрд теңгеге болатын қуаттылығы тәулігіне 24 000 м3 су қондырғысын салуға 10 млрд теңге бөлінді. Бұдан басқа, Құйылыс кен орнынан МАЭК пен Ақтау су тұшыту зауытына дейінгі ұзындығы 47 шақырым су құбырын салу бойынша жалпы сомасы 18 млрд теңгеге жоба іске асырыла бастады. Сонымен қатар, биыл біз Үкіметке кәсіпорын жұмысын тұрақтандыру үшін жабдықтар сатып алуға 4 млрд 900 млн теңге көлемінде қаражат бөлу туралы ұсыныс енгіздік. Қазіргі уақытта Премьер-Министрдің тапсырмасы бойынша 4 млрд 900 млн теңге бөлінеді. Биыл мекеменің тұрақты жұмысы үшін күрделі және ағымдағы жөндеу жұмыстарын жүргізуге МАЭК кәсіпорны өз қаражатынан 6 млрд 800 млн теңге бөлді. Бұл мекеменің облыс үшін маңыздылығын ескере отырып, облыстық бюджет резервінен 2 млрд 600 млн теңге бөлінді», - деді облыс әкімі Нұрлан Ноғаев.
Айта кетсек, аталған комиссия құрамында өңір басшысы Нұрлан Ноғаев, Маңғыстау облысы әкімінің бірінші орынбасары, Ақтау қаласының әкімі, «МАЭК-Қазатомөнеркәсіп» ЖШС Бас директоры, «МЭК» АҚ басқарма төрағасы, атом және энергетикалық қадағалау мен бақылау комитетінің Маңғыстау облысы бойынша аумақтық департаментінің басшылығы кірді.
Бұған дейін хабарлағанымыздай, Премьер-Министр Әлихан Смайылов Маңғыстау атом энергетикалық комбинатында және Атырау мұнай өңдеу зауытында болған апаттардың себептерін тергеу жөніндегі мемлекеттік комиссияның отырысын өткізді.