23:34, 05 Қараша 2021

Махмұд Сабырхан әлем чемпионатының күміс жүлдегері атанды

БЕЛГРАД. ҚазАқпарат - Сербия астанасы Белград қаласында өтіп жатқан бокстан әлем чемпионатының финалында бүгін Махмұд Сабырхан қарсыласына есе жіберді, деп хабарлайды ҚазАқпарат тілшісі.

Махмұд Сабырхан 54 келіде жапониялық Томоя Цубоимен шеберлік байқасты.

Бірінші раундта Махмұд қарсыласын 3:2 есебімен сүріндірді. Дегенмен екінші раундта қарсыласына 0:5 есебімен жеңілді.

Жалпы нәтижеде жапониялық жеңіске жетті. Осылайша Махмұд күміс жүлдені қанағат тұтты.

Сондай-ақ, бүгін финалда Теміртас Жүсіпов (48 келі) таиландтық Вуттичай Юрачайды жеңіп, әлем чемпионы атанды.

Айта кетсек, 6 қарашада Сәкен Бибосынов (51 келі) және Серік Теміржанов (57 келі) алтын жүлдеге таласады.

Ал ел құрамасынан Абылайхан Жүсіпов (67 келі) жапон Севонрец Окадзаваға есе жіберді.

Еске салсақ, ширек финалда Нұрбек Оралбай (80 келі), Санатали Төлтаев (63,5 келі) Асланбек Шымбергенов (71 келі), Саматәли Төлтаев (60 келі) пен Нұрқанат Райыс (75 келі) қарсыластарына жол берді.

Ал ширек финалға дейін Бек Нұрмағамбет (86 келі), Айбек Оралбай (92 келі) пен Нұрлан Сапарбай (92 келіден жоғары) қарсыластарына жол берді.

Бокс Спорт

Әділжан Үмбет

1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді. 2015-2020 жылдарда «Ақмешіт апталығы» газетінің бас редакторы болды. Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті. 2018 жылдан бері «Kazinform» ақпарат агенттігінде Қызылорда облысындағы меншікті тілші.