Малайзиялық компанияның мәселесі оң шешіледі деп үміттенемін — бизнес-омбудсмен

АСТАНА.KAZINFORM — 13 наурызда Қазақстан кәсіпкерлерінің құқықтарын қорғау жөніндегі уәкіл Қанат Нұров баспасөз конференциясында сөз сөйледі. Бұл конференцияны малайзиялық компания өкілдері «Қазақстан Ғарыш Сапары» АҚ тарапынан инвестициялық келісімшарттың біржақты бұзылуына қатысты жағдайды баяндау мақсатында ұйымдастырған.

2018 жылы малайзиялық инвестор Астанада 14,5 гектар жер телімінде ауқымды құрылыс жобасына қатысуға шақырылды. Инвестор 96 млрд теңге салуға міндеттеніп, оның 20 млрд теңгесін инвестициялаған.

Жоба аясында тұрғын үй кешендері мен Массачусетс технологиялық институты және Кембридж университетімен әріптестік орнатқан халықаралық мектеп салынды.

Спикерлердің мәліметінше, тек 1,6 млрд теңге инженерлік коммуникацияларға, яғни тұрғын үйлер мен мектепті су құбырына, жылу жүйесіне және электр энергиясына қосуға жұмсалған.

Алайда, 2024 жылдың ақпанында «Қазақстан Ғарыш Сапары» АҚ күтпеген жерден келісімшартты бұзды. Олар мұны инвестордың 700 мың теңге көлеміндегі екі аптаға кешіктірілген қарызымен түсіндірді. Алайда бұл қарыз келісімшарт бұзылғанға дейін өтелген.

Қанат Нұров бұл істі зерттегеннен кейін Бас прокуратураға Жоғарғы сотқа кассациялық наразылық енгізу туралы өтініш жолдағанын айтты. Бұл келісімшарттың бұзылу заңдылығын қарастырып, инвестициялық климатқа әсерін бағалауға мүмкіндік береді.

- Малайзиялық компания сәттілікке жетеді деп үміттенемін және біздің құқықтық жүйеміз әділ шешім шығарады деп сенемін, – деді Қанат Нұров.

Айта кетелік  5 жылда геологиялық барлау жұмыстарына 12 млрд теңге шетел инвестициясы тартылды.