МӘМС жүйесінен тыс қалған 3,3 млн адам қалай қамтылады – министрлік түсінік берді
АСТАНА. KAZINFORM — Жұмыссыз адамдардың МӘМС жарналарын төлеу шығыстарын жергілікті бюджеттерге жүктеу ұсынылды. Бұл туралы бүгін Парламент Мәжілісінде міндетті әлеуметтік медициналық сақтандыру мәселелері заң жобасын таныстыру кезінде ҚР Денсаулық сақтау министрі Ақмарал Әлназарова айтты.
- Қазір шамамен 16,7 млн (82,3 %) адам сақтандырылған болса, оның 12,1 миллионы (72,5%) жеңілдікті санаттарға жатады, 3,3 млн адам МӘМС жүйесінен тыс қалған. Оның ішінде 2,4 млн адамның өмір сүру деңгейі қанағаттанарлық азаматтар болса, ал 1 миллионы әлеуметтік әл-ауқаттың дағдарыстық және шұғыл деңгейлеріне жататын осал топтағы азаматтар, яғни табысы төмен әрі отбасының базалық қажеттіліктерін әрең жабатын адамдар. Осы санаттағы азаматтар үшін халықаралық тәжірибеге сәйкес, жарналардың төленуі тиісті медициналық көмекке жүгіну фактісі бойынша жергілікті атқарушы органдарға (ЖАО) жүктеу ұсынылады. Бұдан басқа, ресми тіркелген жұмыссыз азаматтардың МӘМС жарналарын төлеу шығыстарын 2027 жылдан бастап жергілікті бюджеттерге жүктеу ұсынылды, - деді А. Әлназарова.
Оның айтуынша, осы шаралардың есебінен 2026 жылы МӘМС жүйесімен қосымша бір миллионнан астам адам қамтылуы мүмкін. Бұл дегеніміз, азаматтардың қосымша 5 пайызы жоспарлы медициналық көмекке қол жеткізеді деген сөз.
- Медициналық көмекті пакеттер бойынша жасанды бөлу проблемасын шешу үшін 2026 жылдан бастап Тегін медициналық көмектің кепілдендірілген көлемі (ТМККК) пакетінен негізгі міндеттемелерді МӘМС жүйесіне ауыстыру арқылы кезең-кезеңімен біріктіру ұсынылады (бірінші кезең ішінара 2025 жылдан басталады), - деді министр.
Бірыңғай пакетке көшудің негізгі мақсаттары:
- сақтандыру мәртебесіне қарамастан, кең таралған аурулар бойынша базалық медициналық көмекті кепілдендірілген түрде қамтамасыз ету;
- пакеттер арасындағы медициналық қызметтердің бір-біріне көшуін болдырмау;
- созылмалы аурулары бар науқастарды барынша медициналық бақылаумен қамту.
- Нәтижесінде, жүйенің ашық және әділ болуы жүзеге асады. Әрбір азамат қандай қызметтерге кепілдік берілетінін және МӘМС жүйесінде қандай қызметтер қарастырылғанын білетін болады. Жалпы алғанда, Бірыңғай пакеттің негізгі құрылымы мемлекеттің кепілдендірілген көмегі пакетінен және сақтандырылған көмек деңгейінен қалыптасады. Осылайша, 2027 жылдан бастап қаржыландырудың сақтандыру моделіне көшуді жоспарлап отырмыз. Осы орайда медициналық көмектің Бірыңғай пакетін кезең-кезеңімен қалыптастыру ұсынылған. Сонымен қатар, депутаттардан келіп түскен ұсыныстар қаралып жатыр. Оларды ескере отырып, медициналық көмектің қолжетімді болуын қамтамасыз ету үшін тегін медициналық көмектің кепілдендірілген көлеміндегі қызметтер пакетінде базалық медициналық санитариялық алғашқы көмекті (МСАК) қарастыруға дайынбыз, - деді ведомство басшысы.
Оның сөзіне қарағанда, аталған заң жобасындағы басталамалар жүзеге асқаннан кейін, ТМККК пакетінде медициналық қызметтердің үлкен спектрін емін-еркін пайдалану сақталады. Соның арасында вакцинация және онкологиялық скринингтер, әлеуметтік мәні бар аурулар бойынша күдік болған жағдайда диагностикалар (туберкулез, АИТВ, созылмалы вирустық гепатиттер және бауыр циррозы, қатерлі ісіктер, психикалық және мінез-құлық бұзылыстары, орфандық аурулар, жедел миокард инфарктісі (6 айға дейін.), инсульт (1 жылға дейін)) толығымен тегін болады. Сондай-ақ жұқпалы аурулар кезіндегі медициналық көмек және медициналық көмектің басқа түрлері кепілдендірілген пакеттің ішінде болады.
Бұдан бұрын хабарланғандай, бүгін Парламент Мәжілісінде «Қазақстан Республикасының кейбір заңнамалық актілеріне міндетті әлеуметтік медициналық сақтандыру мәселелері бойынша өзгерістер мен толықтырулар енгізу туралы» заң жобасы таныстырылды.