Мамырда Ақтөбе облысына қарасты 4 ауылдың әкімі сайланады

АҚТӨБЕ. ҚазАқпарат – 14 мамырда Ақтөбе облысындағы 4 ауылдық округтің әкімдерін сайлау өтеді, деп хабарлайды ҚазАқпарат тілшісі.

Мәлім болғандай, Ақтөбе облысына қарасты мына 4 ауылдық округтің әкімдері сайланады:

- Алға ауданының Тамды ауылдық округінің әкімі;

- Әйтеке би ауданының Темірбек Жүргенов ауылдық округінің әкімі;

- Ырғыз ауданының Аманкөл ауылдық округінің әкімі;

- Ойыл ауданының Ойыл ауылдық округінің әкімі.

«5 сәуірде 4 ауданның аумақтық сайлау комиссияларының отырыстарында облыстың 4 ауылдық округ әкімдерін сайлау тағайындалды. Әкімдерді сайлау бойынша сайлау округтері құрылды. 2023 жылғы 14 мамырға тағайындалған ауылдық округтер әкімдерінің сайлауын дайындау мен өткізу жөніндегі негізгі іс-шаралардың күнтізбелік жоспарлары бекітілді», - делінген Ақтөбе облысы әкімдігінің ресми сайтында жарияланған хабарламада.

Ауылдық округ әкіміне кандидаттарды ұсыну кеше, яғни 6 сәуірде басталды.