АҚТАУ. KAZINFORM — Маңғыстау облысы Түпқараған ауданындағы Таушық ауылында жауған жаңбырдан кейін көшелерді су басып, екпінді су ағыны жүрген. Әлеуметтік желіде тараған бейнежазбада елді мекен аумағымен аққан нөсер суының жолдарды шайып жатқанын көруге болады.
Таушық ауылының әкімі Нұржан Бақтыбаевтың айтуынша, қатты нөсер жауын шамамен сегіз минутқа созылған. Жауын-шашын көп мөлшерде түнгі сағат 01:00-ден 02:00 аралығында және таңғы сағат 10 да жауған. Дегенмен, төтенше жағдай тіркелмеген.
-Тұрғындардан ешқандай шағым түскен жоқ. Үйлерді су басу немесе шатырлардың бүліну жағдайы тіркелген жоқ. Негізгі су ағыны теңіз бағытына қарай кетті. Қазіргі уақытта елді мекендегі жағдай тұрақты, - дейді ауыл әкімі.
Бұған дейін, Найзағай, нөсер жаңбыр: 15 маусымда бес өңірде 39°C ыстық болатыны хабарланған болатын.
Аягөз Ізбасарова
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.