Полицияның мәліметінше, 28 тамыз күні Ақтау қаласында Маңғыстау облысы полиция департаменті криминалдық полиция қызметкерлері ЖБО, ЖҚАЖ және патрульдік полиция батальоны қызметкерлерінің қатысуымен жүргізілген жедел-іздестіру іс-шаралары барысында Toyota Camry автокөлік жүргізушісін тоқтатты.
— Автокөлікті тінту барысында жүксалғыштан сегіз пакетке салынған жалпы салмағы 205 келі болатын 50 дана бекіре балығы табылып, тәркіленді, — делінген полицияның баспасөз қызметі таратқан хабарламада.
Автокөлікте болған екі ер адам ұсталып, полицияға жеткізілді.
Бұл дерек бойынша ҚР ҚК-нің 339-бабының 1-бөлігімен қылмыстық іс қозғалды. Тәркіленген балық жауапты сақтауға берілді.
Тергеу жалғасып жатыр.
Еске салайық, бұған дейін Ақтауда 256 келі бекіре тұқымдас балық тәркіленген еді.