Мерекелік шараларды ұйымдастыру алқасының мүшесі Сүйіндік Ризаның айтуынша, екі күнде жиырмадан астам шара жоспарланған.
— Отпан тауға 58 ағаш үй тігілді. Шамамен 10 мыңдай адамды қарсы алуға мүмкіндік бар. Амал мерекесін көру үшін Қазақстанның түкпір-түкпірінен қонақтар келіп жатыр. Сондай-ақ, мерекелік іс-шараға атсалысамыз деп Әзербайжан, Түркия, Өзбекстан мен Түрікменстан елдерінен дәстүрлі әншілері келді. Осы жаңа «Амалдың ақ таңы» атты облыстық суретшілер пленэрінің ашылу салтанаты өтті. Театрландырылған көрініс көрсетіліп, «Бірлік оты» жағылды, — дейді Сүйіндік Риза.
Амал мерекесіне арнайы келген меймандар биылғы шаралардың жоғары деңгейде ұйымдастырылғанын атап өтті.
— Амал мерекесі үшін Маңғыстау өңіріне арнайы келдім. Бұрын телеарна арқылы көретін болсақ, бүгін өзім куә болып тұрмын. Отпан тауына көтеріліп, Адай ата кесенесінде болдық. Халықтың көңіл-күйі жақсы. Өте жоғары деңгейде ұйымдастырылған. Амалдан амалға аман-есен жете берейік! Еліміз тыныш болсын! , — дейді Ақтөбе қаласының тұрғыны Салтанат Агисова.
Шетелдік қонақтар да маңғыстаулықтарға ақжарма тілегін арнады.
— Маңғыстау өлкесі, сондай-ақ күллі қазақ халқы үшін ерекше мейрам — Амал мерекесіне қатысу мен үшін үлкен мәртебе. Халықтың қонақжай қасиеті, жылы қабылдағаны қуантады. Ұлттық киім киген көпшіліктің бір-бірімен қол алысып көрісуі әдемі көрініс. Барша қазақстандықтарды Амал мерекесімен құттықтаймын! , — дейді Өзбекстан Республикасының әртісі Роза Раджапова.
Амал мерекесі аясында қазақша күрес, түйе палуан, тоғызқұмалақ сияқты ұлттық спорт түрлерінен жарыстар, ошақ бәйге, тай жарыс пен аламан бәйге, шашақ құлақты тазы иттерінің жарысы жоспарланған.
Сондай-ақ, Мұрат Өскінбаев атындағы Маңғыстау облыстық филармониясының өнерпаздары мен Түркия, Әзербайжан, Өзбекстан, Қырғызстан мемлекеттері әншілерінің қатысуымен гала-концерт өтті. Жыр-терме кеші болып, оған оннан астам жырау қатысты.
Бұған дейін, Ақтау қаласы әкімінің орынбасары бір-ақ күн жұмыс істеп, қызметінен кеткені туралы жазған болатынбыз.