Баланың қайтыс болғанын туыстары растады. Олардың айтуынша, бала кеше, 6 қазанда жансақтау бөлімінде көз жұмды.
Туыстары баланың өлімі бұған дейін өзі тұтынған үй жағдайында дайындалған балықтан улануымен байланысты болуы мүмкін деп есептейді.
Баланың ауруханаға түскен әкесінің жағдайы тұрақтанған. Отбасының тағы екі ересек мүшесі облыстық көпбейінді ауруханада ем қабылдап жатыр.
Маңғыстау облыстық денсаулық сақтау басқармасы ботулизм диагнозымен ауруханаға түскен бір отбасы мүшелерінің жағдайына қатысты ақпарат берді.
Ведомствоның мәліметінше, 2026 жылғы 21 қыркүйекте бір отбасының төрт мүшесі, оның ішінде кәмелетке толмаған бала, ысталған балық өнімін тұтынғаннан кейін ботулизмге тән белгілермен медициналық көмекке жүгінген.
Науқастарға шұғыл медициналық көмек көрсетіліп, ботулизмге қарсы сарысу енгізілген. Олардың жағдайын тұрақтандыру үшін республикалық деңгейдегі реаниматологтар, инфекционистер мен неврологтар тартылған.
— Көрсетілген медициналық көмектің барлық көлеміне қарамастан, өкінішке қарай, кәмелетке толмаған баланың өмірін сақтап қалу мүмкін болмады, — деп хабарлады облыстық денсаулық сақтау басқармасы.
Қазіргі уақытта қалған үш науқасқа қажетті медициналық көмек көрсетіліп, олар дәрігерлердің бақылауында.
Бұған дейін Маңғыстау облысының Мұнайлы ауданында үй жағдайында ысталған балықты тұтынған тұрғындардың ауруханаға түскенін хабарлаған болатынбыз. Үш ересек адам мен 9 жастағы балада ауыр ботулизм белгілері анықталды. Оларға ботулизмге қарсы сарысу енгізілді.
Кейін балықтан уланып, ауруханаға түскен 9 жастағы баланың туыстары көмек сұраған еді.