Маңғыстауда мұнай компаниясы қызметкерлеріне 197 млн теңге қарыз болып шықты

АҚТАУ. KAZINFORM – Ақтау қаласының прокуратурасы «Mangystau Oil Refining» ЖШС-де жалақы төлеу заңнамасының сақталуына талдау жүргізіп, заңсыздықтарды әшкерелеген.

Маңғыстау облыстық прокуратурасының мәліметінше, 2025 жылдың қаңтарынан наурыз айына дейін кәсіпорын 241 қызметкеріне жалақы төлемегені анықталды. Жалпы берешек сомасы - 197 миллион теңгені құраған. 

Қабылданған прокурорлық қадағалау шараларының нәтижесінде, жұмысшылардың конституциялық құқықтары қорғалып, оларға жалақы толығымен төленген. 

- Жалақы төлеуді кешіктірген заңды тұлға әкімшілік жауапкершілікке тартылды, - делінген хабарламада. 

Бұған дейін, Маңғыстау облысында 90 мың гектардан астам жер мемлекет меншігіне қайтарылған болатын.