Сарбаздың анасы Лаура Шынтемірованың айтуынша, баласы әскерге барған күннен бастап қысым көрген. Әлімжеттікке шыдамай бірнеше рет өзіне қол салмақ болған.
— Маған командирі телефон шалып, «балаңыздың жүрегі мен бүйрегінде мәселе бар, соны дәрігерге қаратуға апара жатырмыз» деді. Ол өтірік болып шықты. Баламды психиатриялық ауруханаға апарып жатқызған. Оны мен басқа бір ата-анадан естідім, — дейді сарбаздың анасы Лаура Шынтемірова.
Облыстық психикалық денсаулық орталығының директоры Мәди Тоқанов клиникаға суицидке бейім үш әскери жеткізілгенін хабарлады.
— Өздеріне жарақат салған, білектері сырылған. Олармен психолог, психотерапевт мамандар жұмыс істеп жатыр. Жалпы жағдайлары жақсы, 2-3 күнде шығарамыз, — дейді орталық басшысы.
Kazinform тілшісі аталған әскери бөлімге сұрау салғанымен осы уақытқа дейін жауап келіп түскен жоқ.
Еске сала кетейік, бұған дейін Шымкентте қаза тапқан сарбаз жер қойнына тапсырылған болатын.