Археологиялық зерттеулер аталған өңір арқылы осыдан 2000 жыл бұрын халықаралық сауда қатынастары жүргенін дәлелдейді. Мамандардың пікірінше, Қарақабақ Ұлы Жібек жолының солтүстік тармағындағы маңызды теңіз-құрлық сауда торабы болған. Ол Каспий маңы мемлекеттерінің саяси, экономикалық және сауда байланыстарында ерекше рөл атқарған.
Қалашықтан Византия, Үндістан, Рим, Парсы және Қытай елдерімен байланысты дәлелдейтін тиындар, мөрлер, қыш ыдыстар мен түрлі жәдігерлер табылған. Сонымен қатар археологтар көне порттың іздерін, қолөнер өндірісі мен теңіз саудасына қатысты көптеген деректерді анықтаған.
Ғалымдардың пайымдауынша, Қарақабақ ІІ ғасырдағы Рим ғалымы Клавдий Птолемей жасаған Каспий теңізінің шығыс жағалауы картасында Аспабота атты қала-мемлекет ретінде көрсетілуі мүмкін. Зерттеушілердің айтуынша, бұл қала өз дәуіріндегі ірі логистикалық және сауда орталықтарының бірі болған.
Мамандар бұл жаңалықтар Маңғыстаудың көне өркениеттер мен халықаралық сауда қатынастарындағы маңызды орнын айқындай түсетінін атап өтті.
Айта кетейік, Қазақстанда археологиялық жұмыстарға 5 жылдық лицензия енгізіледі.