Маңғыстауда фельдшерлер жүкті әйелді жедел жәрдем көлігінде босандырып алды
АҚТАУ. KAZINFORM – Маңғыстаулық фельдшерлер Күнсия Бекназарова мен Камила Кеулімжаева аяғы ауыр әйелді көлікте босандырып, ана мен баланы аман алып қалды. Мұнайлы ауданы Батыр ауылының тұрғыны жүктіліктің 37 аптасында жедел жәрдем шақырған. Алайда перзентханаға жетпей жолда босанды.
Фото: Қоғамдық коммуникация орталығы
«Жүктілігі 37-апта болған әйелді жедел жәрдем көлігімен Батыр ауылынан Ақтау қаласындағы облыстық перзентханаға апара жатқанбыз. Жолда кенеттен әйелдің толғағы жиілеп, көлікте босандыруға тура келді. Сәбидің аман-есен дүниеге келуіне көмектестік. Мұндай жағдайда дер кезінде ана мен сәбидің амандығы үшін күш саламыз. Себебі әр минут маңызды», - дейді Мұнайлы ауданы жедел жәрдем бөлімшесінің фельдшері Күнсия Бекназарова.
Фото: Қоғамдық коммуникация орталығы
Фельдшерлер жаңа туған нәрестенің кіндігін кесіп, Маңғыстау облыстық «Ана мен бала» орталығына жеткізген. Бүгінде жас босанған ана да, сәби де мамандардың бақылауында. Жағдайы жақсы. Нәрестенің салмағы – 3 келі 200 грамм, бойы – 52 сантиметр.
Фото: Қоғамдық коммуникация орталығы
Бұған дейін Алматылық жүкті әйелдің патрульдік көлікте босанғанын жазған едік.
Ізбасарова Аягөз Оралбайқызы телевизия саласында 2003 жылдан бері жұмыс істейді. Еңбек жолын «Қазақстан» РТРК» АҚ Маңғыстау облыстық филиалы «Қазақстан-Ақтау» телеарнасында жүргізуші-редакторлықтан бастап, редактор, шеф-редактор қызметтерін атқарды. Соңғы 7 жылдан бері «Қазақстан» Ұлттық арнасының Маңғыстаудағы меншікті тілшісі. Ақпарат саласының үздігі. Kazinform халықаралық ақпарат агенттігінде 2024 жылғы мамырдан бастап қызмет етеді.