Маңғыстаулық құтқарушылар Атырау облысына көмекке аттанды
АҚТАУ. KAZINFORM — Атырау облысында су тасқыны жағдайының күрделенуіне байланысты Маңғыстау облыстық төтенше жағдайлар департаментінің жедел тобы 18 наурыз күні көмекке кетті.
— Жедел топтың құрамында 55 адам бар. Сонымен қатар 4 техника, 5 мотопомпа, 1 үрмелі қайық жіберілді, — дейді төтенше жағдайлар департаментінің баспасөз қызметі.
Жедел топ авариялық-құтқару мен кезек күттірмейтін жұмыстарға жұмылдырылады.
Бұған дейін, Атырау облысында Жем мен Қиғаш өзендерінде су тасқыны қаупі жоғары екені анықталған еді. Осыған орай аталған су айдындарының маңында орналасқан елді мекендерді қорғау үшін қажетті шаралар қабылданған еді.
Су тасқыны кезіндегі залалды жою үшін 1 511 адам, 244 техника, 187 мотопомпа, 20 жүзу құралы, 3 тікұшақ әзір тұр. Сондай-ақ 48,5 тонна жанар-жағармай, 235 тонна инертті материал, 866 мыңнан астам қапшық, 69 дана шатыр, 5 мыңнан астам төсек жабдығы дайындалған. Тұрғындардың қауіпсіздігі үшін 200 эвакуациялық пункт әзірленді.