Маңғыстау: Қаржы полициясы мен ТЖД қызметкерлерін өңірлік кезектен тыс аттестаттау қорытындылары шығарылды
14:47, 24 Қаңтар 2013
АҚТАУ. 24 қаңтар. ҚазАқпарат - Маңғыстау облысы бойынша экономикалық қылмысқа және сыбайлас жемқорлыққа қарсы күрес департаменті қызметкерлерінің өңірлік кезектен тыс аттестаттау қорытындылары шығарылды.
«Аттестаттаудың қорытындысы бойынша қаржы полициясы департаментінде 52 қызметкер қызметтеріне лайық деп танылды. 14-і кадр резервіне алынуға немесе қызметін жоғарылатуға ұсынылды. Тоғыз қызметкер қызметтерін төмендетті. Алтауы қызметтеріне лайық емес деп танылды және басқа қызметке ауысуға ұсынылды. Екеуі жұмыстан қуылды», - деді Маңғыстау облысы бойынша экономикалық қылмысқа және сыбайлас жемқорлыққа қарсы күрес департаменті (қаржы полициясы) кадр бөлімінің аға инспекторы Динара Жаукерова.
Маңғыстау облысы бойынша ТЖД қызметкерлерінің де кезектен тыс аттестауы аяқталды. Онда 529 қызметкер кәсіби жарамдық тексерісінен өтті. Олардың 54-і сыннан сүрінді.