Маңғыстау облысында жел энергетикасын дамытады

АҚТАУ. 23 қаңтар. ҚазАқпарат - Маңғыстау облысында жел энергетикасын дамытады. «Energy Worldwide Holding» холдингі Маңғыстау облысында қуаттылығы 250 МВт екі жел құрылғысын салуға ниетті.

Бұл туралы «EXPO-2017: Аймақтық бастамалар» форумында холдинг төрағасы Алекс Пилетский мәлімдеді.

Оның форумда айтуынша, Маңғыстау облысының үлкен жел әлеуеті бар (жылдамдығы 8,5 - 8,7 м/с). Бірінші жел фермасын Қарақия ауданының Құрық ауылында салу жоспарланып отыр. Ол екі мың гектар аумақта орналасады, оның қуаттылығы 150 МВт құрайды. Екінші жел фермасын Мұнайлы ауданында орналастыруға болады. Бұл жел фермалары үшін еуропалық жабдықтар Жерорта теңізі бойынша, Волга-Дон арнасы арқылы әкелінеді. Жабдықтар Құрық кемежайының қазіргі инфрақұрылымы базасында түсіріледі.

«Қажетті рұқсат қағаздарды алған соң, 11 айдың ішінде біз мәлімдеген жобаларды іске асыра аламыз», - деді Алекс Пилетский.