Ақмола облысы Ақкөл ауданындағы «Еңбек» ЖШС егіс даласында өтіп жатқан дәстүрлі форумның ашылу салтанатында облыс әкімі Марат Ахметжанов жергілікті ауыл шаруашылығы саласындағы оң көрсеткіштерді тілге тиек етті.
Атап айтсақ, 2023 жылдың қорытындысы бойынша Ақмола облысының тауар айналымы 2 млрд долларды (950,5 млрд теңге) құраған. Бұл – 2022 жылмен салыстырғанда 27% - ға артық. 2023 жылы өңірдің Франциямен сыртқы сауда айналымы 2022 жылмен салыстырғанда 23 есе өсіп, 72 млн долларға (34,2 млрд теңге) жетті. Германиямен сауда айналымы 5 есеге дейін өсіп, 181 млн долларды құраған (86 млрд теңге).
«Бүгінде біздің облыс республиканың ірі астық егетін өңірлерінің бірі болып табылады. Ақмола облысында Қазақстандағы барлық құс етінің 30% - ы, тауық жұмыртқасының 16% - ы өндіріледі. Сондай-ақ біздің өңір азық-түлік тауарларын өндіру бойынша көшбасшылардың бірі. Жуырда АӨК бағытында жалпы сомасы 130 млрд теңгеден кем емес 79-дан астам ірі инвестициялық жобаны іске асыру жоспарланып отыр», - деді облыс басшысы.
Айта кетейік, жергілікті өндірушілердің ет және консерві өнімдері Ресей Федерациясына, ҚХР-ға, сүт өнімдері РФ-ға, ұн өнімдері жақын шет елдерге (Қырғызстан, Өзбекстан, Тәжікстан, Ауғанстан, ҚХР) және Біріккен Араб Әмірліктеріне экспортталады