Мароккода қаза тапқандар саны 1,3 мыңнан асты: Елде қаралы күн жарияланды

МАРРАКЕШ. ҚазАқпарат – Өткен түні Мароккода болған жойқын зілзала салдарынан қаза тапқандар саны жергілікті сағат 19.00-дегі (GMT+1) жағдай бойынша, 1305 адамға жетті. Тағы 1832 адам зардап шекті, олардың 1220-сы аса ауыр халде. ҚазАқпарат бұл туралы EFE-ге сілтеме жасап хабарлайды.

Елдің Ішкі істер министрлігі жариялаған соңғы мәліметке сәйкес, мерт болғандар саны ондаған провинцияда тіркелді: жер сілкінісі ошағына жақын орналасқан Марракештің оңтүстігіндегі Эль-Хаузда 694 адам көз жұмды, одан кейін тізімде Тарудант (347 адам мерт болды), Чичауа (191), Уарзазат (39), Марракеш (14), Азилал (11), Агадир (5), Касабланка (3), Аль-Юсуфия (1) және Тингуир (1) тұр.

Марокко королі Мұхаммед VI көптеген адамның қазасына байланысты елде үшкүндік қаралы күн жариялады. Сондай-ақ ол зардап шеккендерге көмек көрсету және зақымдалған ғимараттарды қалпына келтіру бойынша төтенше жағдай бағдарламасын әзірлеуді бұйырды.

Еске салайық, Мароккода қуаты 7 балдық жерасты дүмпуі 9 қыркүйекке қараған түні болды. Бұған дейін 1037 адамның көз жұмғаны туралы хабарланды.

Президент Қасым-Жомарт Тоқаев Марокко Королі VI Мұхаммедке көңіл айту жеделхатын жолдады.