ОРАЛ. KAZINFORM — Батыс Қазақстан облысында жыл басынан бері мас күйінде автокөлік айдаған 39 тұрғын қылмыстық жауапкершілікке тартылды.
БҚО прокуратурасының баспасөз қызметінен мәлім еткеніндей, осы орайда Сырым аудандық соты ҚР ҚК 346-бабы 1-бөлігіне (көлік құралдарын басқару құқығынан айырылған және алкогольдік мас күйдегі адамның автокөлік айдауы) сәйкес қылмыстық іске нүкте қойды.
Бұған дейін сотталушы ҚР Әкімшілік құқық бұзушылық туралы кодексінің 608-бабы 1-бөлігіне сәйкес 15 тәулікке қамаққа алынып, 7 жыл мерзімге, яғни 2030 жылғы 11 сәуірге дейін көлік құралын басқару құқығынан айырылған. Соған қарамастан, одан тиісті қорытынды шығармай, мас күйінде көлік айдап, қылмыстық құқық бұзушылыққа барған.
— Сот мемлекеттік айыптаушының пікірін ескере отырып, аталған тұрғынды көлік құралын басқару құқығынан өмір бойына айырды. Оған қоса бір жыл бас бостандығынан айыру жазасын кесті, — деп хабарлады ведомстводан.
Еске сала кетейік, бұдан бұрын БҚО-да прокуратура қызметкері өзіне-өзі қол жұмсағанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).