Мажарстан үкіметі суармалы судың шығынын субсидиялайды

АСТАНА. KAZINFORM — Мажарстан үкіметі фермерлерге суармалы суды тегін беру арқылы оның құнын өз мойнына алмақшы, деп хабарлайды АЗЕРТАДЖ.

Елдің ауыл шаруашылығы министрі Иштван Надьтің айтуынша, бұл мақсатқа 10 миллиард форинт бөлінеді.

Қуаңшылық салдарымен күреске дайындық аясында үкімет қосымша 4,7 миллиард форинтті инфрақұрылымды жөндеуге — каналдар, су қақпалары мен сорғыларды қалпына келтіруге бағыттайды.

Министрдің айтуынша, биыл Еуропа қатты қуаңшылыққа тап болды: Тиса мен Дунай өзендеріндегі су деңгейі қалыпты мөлшерден едәуір төмен, ал жаздың соңына болжанған ауа райы — аймақтағы ең ыстық кезеңдердің бірі болмақ.

Қазіргі кезде жаздық дәнді дақылдар мен күнбағыс өнімдері жақсы болса да, жүгері ылғал тапшылығынан зардап шекті. Ауыл шаруашылығы саласының тұрақтылығын сақтау үшін жауын-шашын өте қажет.

Статистикаға сәйкес, соңғы үш жылда Мажарстанда суармалы жер көлемі екі есе артып, 150 мың гектарға жеткен.

Сонымен қатар, фермерлерге ауыл шаруашылығы инфрақұрылымын жаңғырту үшін 176 миллиард форинт бөлінген. Құны 65 миллиард форинт болатын тендер әлі де ашық күйінде тұр.

Осыдан бұрын биыл Мажарстанда жеміс-жидек дақылдарының түсімі күрт төмендеп, бұл бағаның өсуі мен экспорт көлемінің азаюына себеп болды.