Мәжіліс депутаты А. Тасболатов Ресей әскери ғылым академиясының жалпы жиналысында баяндама жасады

АСТАНА. 29 қаңтар. ҚазАқпарат - Ресей Федерациясының Мәскеу қаласында өткен Ресей әскери ғылым академиясының Жалпы жиналысында «Әскери ғылымдар академиясының 2012 жылғы атқарған жұмыстары мен жаһандану кезінде әскери ғылымдарының өзекті мәселелері және алдағы жылы атқарылатын жұмыстар туралы» мәселелер қарастырылды. Осы шарада Қазақстан Республикасы Парламенті Мәжілісінің депутаты, Халықаралық істер қорғаныс және қауіпсіздік комитетінің мүшесі Абай Тасболатов баяндама жасады. Бұл туралы мәжілістің баспасөз қызметінен хабарланды.

Ресей әскери ғылымы академиясының Жалпы жиналысында қаралған күн тәртібіндегі мәселелер арнайы жарыссөз форматында талқыланып, оған академия президенті армия генералы М.А. Гареев төрағалық еткен болатын. Жиынға Ресей Федерациясы Премьер Министрінің орынбасары, Қорғаныс министрі, Теңіз-әскери флотының Бас Қолбасшылары қатысты. Жалпы жиналыста Ұжымдық қауіпсіздік туралы шарт ұйымына мүше мемлекеттердің әскери мақсаттағы өнімдерді әзірлеу, өндіру, пайдалану және қорғаныс саласын ғылыми тұрғыдан дамыту мәселелері жан-жақты талқыланды. Сонымен қоса соңғы он жылдықта әлемде халықаралық қатынастарда, ұлттық қауіпсіздікті қамтамасыз етуде экономикалық факторлар рөлінің дамуының тұрақты беталысы туралы әңгіме өрбіді.

Бұдан бөлек, шараға қатысушылар экономикалық, ақпараттық, кибернетикалық, психологиялық, террористік бағыттағы қылмыстардың өршуіне байланысты Ұйымға кіретін мемлекеттердің қарулы күштерінің бірлесіп атқаратын жұмыстарын талқылады. Осыған орай, ҰҚШҰ-ға мүше мемлекеттердің алға қойған негізгі бағыты - қару-жарақты жаңғырту және әскери техникалардың қазіргі заманғы түрлерін жасау, өнеркәсіптің жоғарғы технологиялық салаларын дамыту болатынына бірауыздан келісті. Сонымен қоса, Жалпы жиналыста Ресей әскери академиясындағы әскери ғылымдардың дамуы жан-жақты талқыланды.