АСТАНА. ҚазАқпарат - Медицина қызметкерлері күні қарсаңында Астана қаласының әкімі Әсет Исекешев дәрігерлерге пәтер кілтін табыстады, деп хабарлайды Қазақпарат тілшісі.
Атап айтқанда, Астана қаласы Онкологиялық орталығының онколог-хирургы Әнуар Әбдікәрімов, №1 қалалық ауруханадағы тамырлық хирургия бөлімінің дәрігер-ангиохирургы Азамат Абдуллинов, №1 қалалық аурухананың травматолог-ортопед дәрігері Аян Сүлейменовтерге жаңа пәтер кілті салтанатты түрде табыс етілді.
Сондай-ақ, №2 Балалар ауруханасы хирургиялық инфекциялар бөлімінің меңгерушісі Жұматай Мәкенов, №2 балалар Жедел хирургия қабылдау бөлімінің травматолог-ортопеді Олжас Байназаров және қалалық Денсаулық сақтау басқармасының бас маманы Жанна Есқалиева баспаналы болды.
«Қаламызда дәрігерлер мен медицина қызметкерлері асқан жанкештілікпен еңбек етіп келеді. Жыл сайын Астанаға 50-100 мың адам келеді және қалалық емханаларға ауыр жүктеме түседі. Күнделікті елорда емханаларына 8,5 мың тұрғын келеді, 400-ге жуық науқас ауруханаға жатқызылады, 120-ға жуық ауыр орта жасалады, жедел жәрдем қызметі 1 500 шақыртуға қызмет көрсетеді. Бұл цифрлардың артында сіздердің баға жетпес еңбектеріңіз тұр», - деді Әсет Исекешев марапаттау рәсімінде.
Айта кетейік, жыл сайын Қазақстанда маусым айының үшінші жексенбісінде медицина қызметкерлері күні аталып өтеді.
Айжан Серікжанқызы
Айжан Серікжанқызы Қасым Л. Н. Гумилев атындағы Еуразия ұлттық университеті Журналистика және саясаттану факультетінің түлегі. Мамандық бойынша РФ Татарстанның Қазан қаласында, Польшаның Вроцлав қаласында тағылымдамадан өткен. 2017 жылдан бері ҚазАқпарат агенттігінде жұмыс істейді.