Мектептерде жаңажылдық шырша міндетті түрде өтуі тиіс - Суханбердиева
17:54, 22 Желтоқсан 2016
АСТАНА. ҚазАқпарат - Қазақстанда Жаңа жыл мерекесіне орай мектеп шыршасын өткізуге шектеу енгізілген жоқ. Бірақ, сыйлыққа ақша жинауға шектеу қойылған. Бұл туралы бүгін ҚР Білім және ғылым вице-министрі Элмира Суханбердиева мәлім етті, деп хабарлайды ҚазАқпарат.
«Еш жерде де қандай да бір бұйрықпен шырша мерекесін өткізуге шектеу қойылған жоқ. Менің білетінім, біздің қалаларымыздың бірқатар мектебінде ата-аналар директорларға жаңажылдық бағдарламаның қымбаттығына шағымданған. Сондықтан мектеп директорлары мектеп шыршасын өткізбеу шараларын қабылдаған. Бұл қоңыраулар бізге түсіп, біз мән-жайды анықтадық. Жаңа жылды мерекелеуге арналған мектеп шыршасы міндетті түрде болуы қажет. Бірақ, сыйлыққа ақша жинауға тыйым салынған», - деді вице-министр.
Суханбердиева Білім министрлігі кез келген қажеттілікке ақша жинауға түбегейлі тыйым салатындығын атап өтті. 1 қаңтардан кейін бұл мәселені шешу үшін министрдің қатысуымен кеңейтілген кеңес өткізілетін болады.