Мемлекет алдында қарызы бар компаниялардың көбіне іс қозғалған - Мемкіріс комитеті

АСТАНА. KAZINFORM – Мемлекеттік кіріс комитеті Аудит департаментінің басқарма басшысы Қайсар Арын мемлекет алдында қарызы бар компанияларға қатысты түсінік берді. 

- Мемлекет алдында қарызы бар компаниялар мен жеке кәсіпкерлердің борышын өндіріп алу бойынша сұрақтар өте ауқымды. Сондықтан тиісті шешімді қажет етеді. Қазіргі кезде мемлекет алдында салық төлеушілердің қарызы 450 млрд теңгеден асады. Оның негізгі бөлігін өндіріп алуда қиындықтар тудыратын бір себебі – ол біраз компанияларға қылмыстық іс қозғалған. Бұл ретте жалған шот-фактура жазу, салықтан жалтару баптары бар. Осы жағдайларда өндіріп алуда кедергілер бар, - деді Қ. Арын әлеуметтік желіде өткен брифингіде.

Осы орайда ол қай жағдайда салық органдары борышкерлердің мүлкіне өндіріп алу шарасын қолданатынын түсіндірді.

- Заңды тұлғалар, жеке кәсіпкерлер салықты уақытында төлемегенде, Салық кодексі аясында хабарлама жолданады. Бұл ретте тәуекел дәрежесі бар. Яғни жоғары дәрежелі тәуекел болса, хабарлама жіберілгеннен кейін, бір жұмыс күні ішінде біз мүлкіне шектеу іс-қиылдарын атқаруымыз керек. Ал орта дәрежелі тәуекел аймағында болса, онда 15 жұмыс күнінде мүлкін шектеу жұмыстарын жүзеге асырамыз. Осы тәртіп Салық кодексінің 120-бабында көрсетілген. Мүлкін шектеу дегеніміз не? Салық төлеушінің тіркеуге қойылған мүлкіне байланысты және бухгатерлік теңгерімінде тұрған мүлікіне шектеу қоямыз. Сонымен қатар, өндіріп алу іс-қимылдарын атқарамыз, - деді комитет өкілі.

Айта кетейік, биыл наурыз айында өткен Ұлттық құрылтайдың IV отырысында Мемлекет басшысы Қасым-Жомарт Тоқаев әділ әрі тиімді салық жүйесін құру керек екенін атап өтті.